भक्तपुर, ६ वैशाख । नेपाल मजदुर किसान पार्टीका अध्यक्ष नारायणमान बिजुक्छेँ (रोहित) को प्रमुख आतिथ्यमा ४२ औँ विश्व सम्पदा दिवसको अवसरमा सांस्कृतिक नगर भक्तपुरको सम्पदा संरक्षणमा ‘सय वर्षपछिको भक्तपुर’ पुस्तकको भूमिकाबारे प्रवचन एवम् अन्तरक्रिया कार्यक्रम बिहीबार सम्पन्न भयो ।
कार्यक्रममा अतिथि बिजुक्छेँले भक्तपुर नगर सांस्कृतिक नगर घोषणा भए ऐन कानुनअनुसार कार्य हुने तथा मौलिकता संरक्षणमा सहजता र एकरूपता आउने विचार व्यक्त गर्दै पुराना घरहरू नगरको पहिचान हो र माटो जोडाइका घरहरू स्वास्थ्यको हिसाबले लाभदायी र सुरक्षित छ भन्नुभयो । उहाँले हरेक कुरामा पुनर्जागरण आवश्यक छ भन्दै काठ र माटोको विशेषताबारे अनुसन्धान गर्नुपर्ने, नयाँ पुस्तालाई पुराना घर, मन्दिर र सम्पदा निर्माणसम्बन्धी तालिमहरू दिनुपर्ने आवश्यकता औँल्याउनुभयो ।
उहाँले भक्तपुर नगरपालिकाले खानेपानीको गुणस्तर हेर्नुपर्ने र घर निर्माण गर्दा नक्सापास प्रक्रियाबारे जनतालाई जानकारी दिनुपर्ने सुझाव दिँदै स्थानीय तह प्रजातन्त्रको जग भएकोले जग बलियो भएमा मात्र प्रजातन्त्र बलियो हुने विचार व्यक्त गर्नुभयो ।
अतिथि बिजुक्छेँले भक्तपुर नगरलाई टेस्टट्युबको रूपमा विकास गर्न नयाँ पुस्तालाई इमानदारीपूर्वक काम गर्न प्रेरित गर्नुपर्ने र विभिन्न देशको इतिहासबाट सिक्नुपर्ने विचार व्यक्त गर्नुभयो ।
भक्तपुर नगरपालिकाका प्रमुख सुनिल प्रजापतिले भक्तपुर नगर ऐतिहासिक, सांस्कृतिकरूपमा अनुपम सहर भएको उल्लेख गर्दै नारायणमान बिजक्छेँ (रोहित) ले आजभन्दा २५ वर्षअगाडि लेख्नुभएको ‘सय वर्षपछिको भक्तपुर’ पुस्तकले नगरको भविष्य कस्तो हुन्छ भन्ने कल्पना गरेको हुँदा भक्तपुर पुनःनिर्माणको निम्ति मार्गनिर्देश गरेको छ भन्नुभयो ।
उहाँले पुस्तक प्रकाशनको ३ वर्षपछि नै भक्तपुर नपाले शिक्षाको जग बलियो बनाउन २०५६ सालमा ख्वप उच्च मावि, २०५८ सालमा ख्वप कलेज र ख्वप ई. कलेज स्थापना गर्दै हाल ७ वटा कलेजहरू स्थापना गर्न सफल भएको बताउँदै यस पुस्तकलाई आधार बनाई हालसम्ममा नगर अस्पताल सञ्चालन, व्यवस्थित आवास योजना सञ्चालन, खानेपानीको व्यवस्था, बजार व्यवस्थापनको लागि नगर प्रहरीको व्यवस्था, पर्यटकहरूको लागि आकर्षण केन्द्र बनाउने, खोला सुधारको लागि २ वटा उपचार पोखरी निर्माण, नगरको पुरानो क्षेत्रमा परम्परागत शैलीमा घर निर्माण गर्नेलाई अनुदान दिई उत्साहित गर्ने तथा विदेशी भाषाको तालिम सञ्चालन गर्दै आएको बताउनुभयो ।

पुरातत्व विभागका महानिर्देशक सौभाग्य प्रधानाङ्गले ‘५० वर्षपछिको नेपाल’ र ‘सय वर्षपछिको भक्तपुर’ बारेको परिकल्पनाले भक्तपुरको मौलिकता संरक्षणमा योगदान पु¥याइरहेको चर्चा गर्दै पुस्तकका लेखकको दूरदृष्टिपूर्ण सोच र परिकल्पनाले नयाँ पुस्ताका लागि सहर निर्माण गर्न गुरुयोजनाको काम गर्नेमा विश्वास व्यक्त गर्नुभयो ।
उहाँले भक्तपुर नगरपालिकाले उक्त पुस्तकको परिकल्पनालाई साकार बनाउने प्रयत्न गरिरहेकोमा खुसी व्यक्त गर्दै सम्पदा संरक्षण र पुनर्निर्माणमा सम्पदाको मौलिक स्वरूप, स्थानीय सामग्रीको प्रयोग, स्थानीय जनसहभागितालाई विशेष महत्व दिनुपर्ने विचार व्यक्त गर्नुभयो ।
इतिहासविद् विश्वमोहन जोशीले कार्यक्रमको औचित्यमाथि प्रकाश पार्दै सम्पदा पुनःनिर्माण र संरक्षणमा भक्तपुर नपा अग्रस्थानमा रहेको बताउनुभयो । उहाँले पुर्खाको सम्पत्ति संरक्षण गरी भनपाले आफ्नो पहिचान र मौलिकतालाई जोगाइरहेको चर्चा गर्दै संस्कृतिकर्मीहरूलाई सम्मान दिने कार्यलाई निरन्तरता दिनुपर्नेमा जोड दिनुभयो ।
कार्यक्रममा भक्तपुर पर्यटन विकास समितिका अध्यक्ष दिपेशराज शर्माले भक्तपुरका सम्पदाहरूको महत्वबारे प्रकाश पार्दै पुस्तकले भक्तपुरमा पर्यटन प्रवद्र्धन गरी नगरलाई उत्कृष्ट गन्तव्यस्थल बनाउन खेलेको महत्वपूर्ण भूमिकाबारे चर्चा गर्नुभयो । भक्तपुर नपाका पर्यटन शाखा प्रमुख गौतम लासिवाले कार्यक्रमको उद्देश्यमाथि प्रकाश पार्दै अध्यक्ष बिजुक्छेँद्वारा लिखित ‘सय वर्षपछिको भक्तपुर’ पुस्तकको सान्दर्भिकताबारे चर्चा गर्नुभयो ।